Уладзіслаў Бубен

Музычны прадусар, празаік, мастак, інсталятар, выкладчык. Аўтар радыё- і тэлепраграм. Музычныя кампазіцыі Бубена выдадзены на больш чым 100 лэблах на ўсіх кантынентах і рэгулярна займаюць месцы ў гіт-парадах ЗША, Вялікабрытаніі, Францыі ды іншых краін. Бубен — адзін з беларускіх піянераў электроннай музыкі і новага кірунку сучаснага мастацтва, дзе ён спалучыў паэзію сучасных аўтараў з відэа, музыкай і іншымі спосабамі самавыяўлення. У 2012 г. у дзяржаўным выдавецтве «Мастацкая літаратура» выйшла ягоная кніга для дзяцей «Марцін і кацяня». Увесь наклад — 2000 асобнікаў — быў распрададзены менш чым за два месяцы.

— Што здарылася? — строга звярнуўся Міхайлавіч да спалоханых работніц, якія стаялі поруч, апусціўшы галовы.

— Не ведаем. Гадзіны тры ўжо бунтуюць. Ніяк супакоіць іх не можам, — заікаючыся ад страху, прамармытала адна з жанчын. — Крыху корму ім зменшылі, вокны некалькі разоў не адчынілі, дык яны адразу бунт паднялі.

Усё добрае калі-небудзь заканчваецца, аднак маладыя вераць у гэта неахвотна. Неверагоднае, усёахопнае пачуццё болю і жаданне помсты перапаўняла ўсю істоту ваўчаняці. Літаральна ўчора важак красаваўся і выхваляўся сваёй сілай, здзекуючыся і зневажаючы слабейшых і нямоглых, а сёння, схоплены фламандскімі паляўнічымі і замкнёны ў клетку, выглядаў зусім разбітым і шкадлівым. Пад свіст і рогат іншых жыхароў лесу шэры разбойнік быў заключаны пад варту для далейшага суду і разбіральніцтва.

— Цяпер гэты Тахелес — уласнасць нашага банка. А прыватнай уласнасці ў нашай краіне яшчэ ніхто не адмяняў. Гэтых мастакоў мы і з іншых памяшканняў паступова выцеснім. Дай толькі час. Нам спяшацца няма куды. Закон на нашым баку. І грошы таксама, — сказаў Гвіда і крыва ўсьміхнуўся.